Latest News :
Home » , , » ബിനീഷിന് ലണ്ടനില്‍ പഠിയ്ക്കാം; വിദേശത്ത് ഉപരിപഠനത്തിന് അവസരം ലഭിച്ച ആദിവാസി യുവാവിന് തുണയായി മന്ത്രി എകെ ബാലന്‍

ബിനീഷിന് ലണ്ടനില്‍ പഠിയ്ക്കാം; വിദേശത്ത് ഉപരിപഠനത്തിന് അവസരം ലഭിച്ച ആദിവാസി യുവാവിന് തുണയായി മന്ത്രി എകെ ബാലന്‍

Written By Muhimmath News on Wednesday, 3 August 2016 | 11:34

കാസര്‍കോട്: ബിനീഷിന്റെ വിദേശത്തെ ഉപരിപഠനം എന്നത് ഇനി സ്വപ്നം മാത്രമല്ല യാഥാര്‍ത്ഥ്യമാകുന്നു. ലണ്ടന്‍ സ്‌കൂള്‍ ഓഫ് ഇക്കണോമിക്‌സില്‍ പ്രവേശനം ലഭിച്ചിട്ടും യാത്ര മുടങ്ങിക്കിടക്കുന്ന ആദിവാസി യുവാവ് ബിനീഷിന് തുണയായി മന്ത്രി എകെ ബാലന്‍.

കാസര്‍കോട് കോളിച്ചാല്‍ സ്വദേശിയായ ബി ബിനേഷ് എല്ലാ പ്രതിബന്ധങ്ങളെയും അതിജീവിച്ച് ലണ്ടന്‍ സ്‌കൂള്‍ ഓഫ് എക്‌ണോമിക്‌സില്‍ എംഎസ്സി ആന്ത്രോപ്പോളജിയ്ക്ക് അഡ്മിഷന്‍ നേടിയിരുന്നു. 45 ലക്ഷം രൂപയുടെ സ്‌കോളര്‍ഷിപ്പോടെയാണ് പ്രവേശനം ലഭിച്ചതെങ്കിലും യാത്രാച്ചിലവിനും ഐഇഎല്‍ടിഎസ് (ഇംഗഌഷ് അഭിരുചി) പരീക്ഷയ്ക്ക് പഠിക്കുന്നതിനും ഒന്നര ലക്ഷത്തോളം രൂപ ചിലവ് വരുമായിരുന്നു. ഈ തുക കണ്ടെത്താന്‍ കഴിയാതെ ബിനേഷ് സര്‍ക്കാരിനെ സമീപിച്ചു. സെക്രട്ടറിയേറ്റിലെ ഫയലില്‍ കുരുങ്ങി നാളിത് വരെയും തുക ലഭിച്ചില്ല.

ഇത് സംബന്ധിച്ച വാര്‍ത്തകള്‍ കഴിഞ്ഞദിവസം പുറത്ത് വന്നിരുന്നു. സെപ്തംബറില്‍ ലണ്ടല്‍ സ്‌കൂളില്‍ പ്രവേശനം നേടുകയും അതിന് മുന്നെ ചെന്നൈയിലെ ബ്രട്ടീഷ് കൗണ്‍സിലില്‍ നിന്നും ഐഇഎല്‍ടിഎസ് പാസാവുകയും വേണം. ബിനീഷിന്റെ അവസരം നഷ്ടപ്പെടുമെന്ന ആശങ്കയോടെ വിഷയം കഴിഞ്ഞദിവസങ്ങളില്‍ മാധ്യമങ്ങളില്‍ വാര്‍ത്തയായി. വിഷയം ശ്രദ്ധയില്‍പ്പെട്ടയുടനെ മന്ത്രി എകെ ബാലന്‍ ബിനേഷിനെ നേരിട്ട് ഫോണില്‍ വിളിക്കുകയും വിഷമിക്കേണ്ടെന്നും ഞാന്‍ ചൊവ്വാഴ്ച ഓഫീസില്‍ എത്തുമെന്നും അന്ന് തന്നെ നേരില്‍ കാണാനും മന്ത്രി നിര്‍ദേശം നല്‍കി. ചൊവ്വാഴ്ച ബിനേഷ് എത്തും മുന്‍പ് തന്നെ മന്ത്രി ബന്ധപ്പെട്ട ഫയല്‍ വരുത്തി കാര്യങ്ങള്‍ മനസിലാക്കി. ഉച്ചയോടെ മന്ത്രിയെ കാണാന്‍ ബിനീഷെത്തി. കാര്യങ്ങളെല്ലാം വിശദമായി മന്ത്രി ചോദിച്ച് മനസിലാക്കി. ലണ്ടന്‍ സ്‌കൂളിലേക്കുള്ള യാത്രാ ചിലവ് സ്‌കോളര്‍ഷിപ്പിന്റെ ഭാഗമായി ലഭിക്കുന്നില്ലെങ്കില്‍ അത് സര്‍ക്കാര്‍ നല്‍കാമെന്ന് മന്ത്രി ഉറപ്പ് നല്‍കി.

ചെന്നൈ ബ്രിട്ടീഷ് കൗണ്‍സിലില്‍ ഐഇഎല്‍ടി കോഴ്‌സിന് വേണ്ട ഫീസും ചിലവും കൂടി 26500 രൂപയാണ് വേണ്ടിയിരുന്നത്. അത് അപ്പോള്‍ തന്നെ പാസാക്കി മന്ത്രി ഫയലില്‍ ഉത്തരവിട്ടു. ചൊവ്വാഴ്ച സര്‍ക്കാര്‍ ഓഫീസുകള്‍ അവധിയായതിനാല്‍ തുക ബിനീഷിന്റെ ബാങ്ക് അക്കൗണ്ടില്‍ ബുധനാഴ്ച തന്നെ നിക്ഷേപിക്കാന്‍ മന്ത്രി തന്റെ സ്റ്റാഫ് അംഗങ്ങള്‍ക്ക് നിര്‍ദേശം നല്‍കി. ബിനീഷിനോട് ബുധനാഴ്ച തന്നെ ചെന്നൈയിലേക്ക് പുറപ്പെടാനും മന്ത്രി പറഞ്ഞു. ചെന്നൈയിലെത്തിയാല്‍ എടിഎം ഉപയോഗിച്ച് പണം എടുക്കാമെന്നതിനാല്‍ ബിനീഷിനും സന്തോഷമായി.

വിദേശ പഠനത്തിന് പട്ടിക വര്‍ഗ്ഗ വിദ്യാര്‍ത്ഥികള്‍ക്കായുള്ള 2015 ലെ ഓവര്‍സീസ് സ്‌കോളര്‍ഷിപ്പ് ബിനീഷിന് ലഭിച്ചിരുന്നു. മൂന്ന് വര്‍ഷത്തെ പഠനത്തിന് 48 ലക്ഷം രൂപയാണ് ലഭിക്കുക. ഈ സ്‌കോളര്‍ഷിപ്പ് ലഭിച്ച 20 ഇന്ത്യന്‍ വിദ്യാര്‍ത്ഥികളില്‍ ഏക മലയാളിയാണ് ബിനേഷ്. കേരളത്തില്‍ നിന്ന് ആദ്യമായാണ് ഒരു പട്ടിക വര്‍ഗ്ഗ വിദ്യാര്‍ത്ഥിക്ക് പ്രശസ്തമായ ലണ്ടന്‍ സ്‌കൂള്‍ ഓഫ് ഇകണോമിക്‌സില്‍ പഠിക്കാന്‍ അവസരം ലഭിക്കുന്നത്.

മുന്‍ രാഷ്ട്രപതി കെആര്‍ നാരായണന്‍ പഠിച്ചതും ഇവിടെയാണ്. എംഎസ്സി സോഷ്യല്‍ ആന്ത്രാപ്പോളജിക്കാണ് അഡ്മിഷന്‍ ലഭിച്ചത്. ബിനേഷിന്റെ അച്ഛന്‍ ബാലനും, അമ്മ ഗിരിജയും രോഗബാധിതരായതോടെ കൂലിപ്പണി ചെയ്താണ് ബിനേഷ് പഠനത്തിനുള്ള വഴി കണ്ടെത്തിയിരുന്നത്.

Share this article :

Post a Comment

 
Copyright © 2016. Muhimmath - All Rights Reserved