Latest News :
മധ്യപ്രദേശില്‍ വോട്ടെണ്ണല്‍ കഴിഞ്ഞു; കോണ്‍ഗ്രസ് ഏറ്റവും വലിയ ഒറ്റക്കക്ഷി
Home » , , » 'പ്രസംഗം മാത്രമാണ് യോഗിയുടേത്, ഭാഷ മോദിയുടേതാണ്' യോഗി ആദിത്യനാഥിന്റെ ഭീഷണിക്ക് മറുപടിയുമായി ഉവൈസി

'പ്രസംഗം മാത്രമാണ് യോഗിയുടേത്, ഭാഷ മോദിയുടേതാണ്' യോഗി ആദിത്യനാഥിന്റെ ഭീഷണിക്ക് മറുപടിയുമായി ഉവൈസി

Written By Muhimmath News on Monday, 3 December 2018 | 10:50
























ന്യൂദല്‍ഹി: തെലങ്കാനയില്‍ ബി.ജെ.പി അധികാരത്തില്‍ വന്നാല്‍ എ.ഐ.എം.ഐ.എം (മജ്‌ലിസെ ഇത്തിഹാദുല്‍ മുസ്ലിമീന്‍) നേതാവ് അസദുദ്ദീന്‍ ഉവൈസിയ്ക്ക് തെലങ്കാനയില്‍ നിന്ന് ഓടേണ്ടി വരുമെന്ന യു.പി മുഖ്യമന്ത്രി യോഗി ആദിത്യനാഥിന്റെ പരാമര്‍ശത്തിന് മറുപടിയുമായി ഉവൈസി. ഇന്ത്യ തന്റെ പിതാവിന്റെ രാജ്യമാണെന്നും ഇവിടെ നിന്നും തന്നെ ഓടിക്കാന്‍ ആര്‍ക്കും കഴിയില്ലെന്നുമാണ് ഉവൈസി പറഞ്ഞത്.

'പ്രവാചകന്‍ ആദം സ്വര്‍ഗത്തില്‍ നിന്നും ഭൂമിയിലേക്ക് ഇറങ്ങിവന്നപ്പോള്‍ അദ്ദേഹം ഇന്ത്യയിലേക്ക് വന്നു എന്നാണ് എന്റെ മതവിശ്വാസം. ഇന്ത്യ എന്റെ പിതാവിന്റെ രാഷ്ട്രമാണ്. ഇവിടെ നിന്നും എന്നെ ഓടിക്കാന്‍ ആര്‍ക്കും കഴിയില്ല.' ഞായറാഴ്ച രാത്രി ഒരു തെരഞ്ഞെടുപ്പു റാലിയില്‍ പങ്കെടുത്തു സംസാരിക്കവെ അദ്ദേഹം പറഞ്ഞു.

നിസാം ഹൈദരാബാദില്‍ നിന്നും ഓടിയെന്ന യോഗിയുടെ പരാമര്‍ശത്തിനെതിരെയും ഉവൈസി രംഗത്തുവന്നു. യു.പി മുഖ്യമന്ത്രിക്ക് ചരിത്രം അറിയില്ല. അതുകൊണ്ടാണ് അദ്ദേഹം നിസാം പലായനം ചെയ്‌തെന്നു പറഞ്ഞതെന്നും അദ്ദേഹം അഭിപ്രായപ്പെട്ടു.

ഇത്തരം ഭീഷണികള്‍ക്കുമുമ്പില്‍ ഭയക്കുന്നയാളല്ല താനെന്നും അദ്ദേഹം പറഞ്ഞു. 'ഇത് യോഗിയുടെ പ്രസംഗം മാത്രമാണ്. അതിന്റെ ഭാഷയും മാനസികാവസ്ഥയും പ്രധാനമന്ത്രി നരേന്ദ്രമോദിയുടേതാണ്.' അദ്ദേഹം അഭിപ്രായപ്പെട്ടു. യോഗി മുഖ്യമന്ത്രിയെപ്പോലെ സംസാരിക്കണമെന്നും മുഖ്യമന്ത്രി പദവിയുടെ മാന്യത നിലനിര്‍ത്തണമെന്നും ഉവൈസി പറഞ്ഞു.

തെലങ്കാനയില്‍ തെരഞ്ഞെടുപ്പ് പ്രചാരണം നടത്തവേയായിരുന്നു ഉവൈസിയ്ക്ക് നാടുവിട്ടോടേണ്ടി വരുമെന്ന് യോഗി പറഞ്ഞത്.

അസംബ്ലി തെരഞ്ഞെടുപ്പില്‍ ടി.ആര്‍.എസിനെയാണ് എ.ഐ.എം.ഐ.എം പിന്തുണയ്ക്കുന്നത്. 2014 തെരഞ്ഞെടുപ്പില്‍ 119 സീറ്റുകളില്‍ 9 സ്ഥലങ്ങളില്‍ മാത്രമാണ് ബി.ജെ.പിക്ക് ജയിക്കാനായത്.

Share this article :

Post a Comment

 
Copyright © 2016. Muhimmath - All Rights Reserved