Saturday, 24 August 2019

യുഎഇയുടെ ഓര്‍ഡര്‍ ഓഫ് സായിദ് ബഹുമതി പ്രധാനമന്ത്രി ഏറ്റുവാങ്ങി

ദുബൈ: യുഎഇ ഗവണ്‍മെന്റിന്റെ പരമോന്നത സിവിലിയന്‍ ബഹുമതിയായ ഓര്‍ഡര്‍ ഓഫ് സായിദ് പുരസ്‌കാരം പ്രധാനമന്ത്രി നരേന്ദ്ര മോദിക്ക് സമ്മാനിച്ചു. അബൂദബിയിലെ പ്രസിഡന്‍ഷ്യല്‍ പാലസില്‍ അബൂദബി കിരീടാവകാശിയും യുഎഇ സായുധ സേന ഉപ സര്‍വ സൈന്യാധിപനുമായ ശൈഖ് മുഹമ്മദ് ബിന്‍ സായിദ് അല്‍ നഹിയാനാണ് പുരസ്‌കാരം സമ്മാനിച്ചത്. തുടര്‍ന്ന് ഇരുവരും കൂടിക്കാഴ്ചയും നടത്തി.

മാസ്റ്റര്‍ കാര്‍ഡിനും വിസ കാര്‍ഡിനും പകരമായി ഇന്ത്യ ഇറക്കിയ റുപേ കാര്‍ഡ് എമിറേറ്റ്സ് പാലസില്‍ നടന്ന ചടങ്ങില്‍ പ്രധാനമന്ത്രി പ്രകാശനം ചെയ്തു. ഇന്ത്യയില്‍ മാത്രം ഉപയോഗത്തിലുണ്ടായിരുന്ന റുപേ കാര്‍ഡ് ഇതാദ്യമായാണ് ഒരു ഗള്‍ഫ് രാജ്യത്തേക്ക് എത്തുന്നത്.

ശൈഖ് മുഹമ്മദ് ഒരുക്കിയ ഉച്ചവിരുന്നില്‍ പങ്കെടുത്ത നരേന്ദ്ര മോദി ബഹ്റൈനിലേക്ക് തിരിച്ചു. വൈകീട്ട് അഞ്ചിന് ബഹ്റൈനില്‍ ഇന്ത്യന്‍ സമൂഹത്തെ അദ്ദേഹം അഭിസംബോധന ചെയ്യും. തുടര്‍ന്ന് ബഹ്റൈന്‍ ഭരണാധികാരി ഹമദ് ഈസാ അല്‍ ഖലീഫയുടെ അത്താഴ വിരുന്നിലും പ്രധാനമന്ത്രി പങ്കെടുക്കും. റുപേ കാര്‍ഡ് ബഹ്റൈനിലും പുറത്തിറക്കുന്നുണ്ട്.


SHARE THIS

Author:

0 التعليقات: