Tuesday, 24 March 2020

കൊവിഡ് 19: ലോകത്ത് മരണം 16000 കടന്നു

റോം/മാഡ്രിഡ്: ലോകത്ത് കൊവിഡ് 19 ബാധിച്ച് മരിച്ചവരുടെ എണ്ണം 16000 കടന്നു. ഇറ്റലിയില്‍ 24 മണിക്കൂറിനിടെ 601 പേര്‍ കൂടി മരിച്ചതോടെ മരണസംഖ്യ 6077 ആയി ഉയര്‍ന്നു. ഇറ്റലിയിലാണ് ഏറ്റവും കൂടുതല്‍ ആളുകള്‍ മരിച്ചത്.

സ്‌പെയിനില്‍ കഴിഞ്ഞ 24 മണിക്കൂറിനിടെ 539 പേരാണ് മരിച്ചത്. നാലരക്കോടി ജനങ്ങള്‍ മാത്രമുള്ള സ്‌പെയിനില്‍ ഇതോടെ മരണസംഖ്യ 2311 ആയി. 35136 പേര്‍ക്കാണ് രോഗം സ്ഥിരീകരിച്ചത്. സ്‌പെയിനില്‍ അടിയന്തരാവസ്ഥ ഏപ്രില്‍ 11 വെര നീട്ടി. ആരും വീടിന് പുറത്തിറങ്ങരുതെന്നാണ് നിര്‍ദേശിച്ചിരിക്കുന്നത്.

ഫ്രാന്‍സിലും ആളുകള്‍ പുറത്തിറങ്ങുന്നത് വിലക്കി. 186 പേര്‍ കൂടി മരിച്ചതോടെ ഫ്രാന്‍സില്‍ മരണം 860 ആയി. 3838 പേര്‍ക്ക് കൂടി വൈറസ് ബാധ സ്ഥിരീകരിച്ചതോടെ രോഗബാധിതരുടെ എണ്ണം 19556 ആയി

പുതുതായി 1861 പേരാണ് ലോകത്ത് മരിച്ചത്. ഒരു ദിവസമുണ്ടാകുന്ന ഏറ്റവും ഉയര്‍ന്ന മരണസംഖ്യയാണിത്. 195 രാജ്യങ്ങളിലായി 378751 പേര്‍ക്കാണ് രോഗം സ്ഥിരീകരിച്ചത്. ഇതില്‍ 101608 പേര്‍ രോഗമുക്തരായിട്ടുണ്ട്.

ഇറ്റലിയില്‍ പുതുതായി 4788 പേര്‍ക്കാണ് രോഗം സ്ഥിരീകരിച്ചത്. ഇതോടെ രോഗബാധിതരുടെ എണ്ണം 63927 ആയി. ഇറ്റലിയില്‍ ആരോഗ്യപ്രവര്‍ത്തകര്‍ക്കിടയില്‍ രോഗബാധ വര്‍ധിക്കുന്നത് ആശങ്ക പരത്തുന്നു. 17 ഡോക്ടര്‍മാരാണ് വൈറസ് ബാധിച്ച് മരിച്ചത്.

കൊവിഡ് 19 വ്യാപനത്തിന്റെ തോത് അതിവേഗം വര്‍ധിക്കുകയാണെന്ന് ലോകാരോഗ്യ സംഘടന മുന്നറിയിപ്പ് നല്‍കി. ആദ്യമായി രോഗം സ്ഥിരീകരിച്ച ശേഷം 67 ദിവസം കൊണ്ടാണ് രോഗികളുടെ എണ്ണം ഒരു ലക്ഷമായത്. എന്നാല്‍ രണ്ടാമതൊരു ലക്ഷമാകാന്‍ 11 ദിവസമാണെടുത്തത്. മൂന്നാമത് ഒരു ലക്ഷമാകാന്‍ മൂന്ന് ദിവസം മാത്രമാണെടുത്തത്.

വൈറസ് അതിവേഗം പടരുന്ന സാഹചര്യത്തില്‍ രാജ്യങ്ങള്‍ നിയന്ത്രണങ്ങള്‍ കൂടുതല്‍ കര്‍ശനമാക്കി. യൂറോപ്യന്‍ രാജ്യങ്ങളെല്ലാം നിശ്ചലമാണ്. യുകെയും യുഎസ്എയും ഏതാണ്ട് പൂര്‍ണമായും ലോക്ക്ഡൗണിലാണ്. ജര്‍മനിയില്‍ രണ്ടിലധികം പേര്‍ കൂടുന്നതിന് വിലക്കേര്‍പ്പെടുത്തി.

ഇറ്റലി, സ്‌പെയിന്‍, ഫ്രാന്‍സ്, ജര്‍മനി എന്നീ രാജ്യങ്ങള്‍ക്ക് പിന്നാലെ കൂടുതല്‍ രാജ്യങ്ങള്‍ ജനങ്ങള്‍ പുറത്തിറങ്ങുന്നത് വിലക്കി. ഗ്രീസ് ഞായറാഴ്ച സമ്പൂര്‍ണ ലോക് ഡൗണ്‍ പ്രഖ്യാപിച്ചു.

യുഎസില്‍ പുതുതായി 10155 പേര്‍ക്ക് കൂടി വൈറസ് ബാധ സ്ഥിരീകരിച്ചതോടെ രോഗികളുടെ എണ്ണം 43721 ആയി. 139 മരണമാണ് പുതുതായി റിപ്പോര്‍ട്ട് ചെയ്തത്. ഇതോടെ മരണസംഖ്യ 552 ആയി. യുഎസില്‍ ജനസംഖ്യയുടെ മൂന്നിലൊന്നും വീട്ടില്‍ നിന്ന് പുറത്തിറാങ്ങാനാകാതെ കുടുങ്ങിയിരിക്കുകയാണ്. ഒഹായോ, ലൂസിയാന, ഡെലെയര്, പെന്‍സില്‍വേനിയ എന്നീ സംസ്ഥാനങ്ങള്‍ അതിര്‍ത്തി അടച്ചു.


SHARE THIS

Author:

0 التعليقات: