Latest News :
Latest Post

ഹാദിയ അക്കാദമിക് കൗണ്‍സില്‍ വ്യാഴാഴ്ച

Written By Muhimmath News on Wednesday, 4 May 2016 | 22:47

കോഴിക്കോട്: മര്‍കസ് അക്കാദമിക് ഓഫ് വിമണ്‍ ആന്‍് ഇസ്‌ലാമിക് സയന്‍സിന്റെ (AWIS) കീഴിലുള്ള ഹാദിയ കോഴ്‌സിന്റെ അക്കാദമിക് കൗണ്‍സില്‍ സിറ്റിംഗ് വ്യാഴാഴ്ച രാവിലെ പത്ത് മണിക്ക് മര്‍കസ് കോണ്‍ഫറന്‍സ് ഹാളില്‍ നടക്കും. സിലബസ് പരിഷ്‌കരണം, പുതിയ അക്കാദമിക് കലണ്ടര്‍, പാഠ്യപദ്ധതി നവീകരണം എന്നിവ യോഗത്തില്‍ ചര്‍ച്ച ചെയ്യും.

സ്ത്രീ പീഡനം: സൗദി മോഡല്‍ നടപ്പാക്കണമെന്ന് സുരേഷ് ഗോപി

തിരുവനന്തപുരം: സ്ത്രീ പീഡകര്‍ക്ക് സൗദി മോഡല്‍ ശിക്ഷ നടപ്പാക്കണമെന്ന് സുരേഷ് ഗോപി എം.പി. കുറ്റകൃത്യങ്ങളിലെ കാടത്തം പരിഗണിക്കുമ്പോള്‍ സൗദി മോഡല്‍ നടപ്പാക്കുന്നതില്‍ തെറ്റില്ലെന്നും അദ്ദേഹം പറഞ്ഞു. നിയമ വിദ്യാര്‍ത്ഥിനി പെരുമ്പാവൂരിലെ ജിഷയുടെ കൊലപാതക പശ്ചാത്തലത്തിലായിരുന്നു സുരേഷ് ഗോപിയുടെ പരാമര്‍ശം.

വിചാരണ നടപടികളിലെ കാലതാമസം ഒഴിവാക്കണം. കുറ്റക്കാര്‍ മുപ്പത് ദിവസത്തിനുള്ളില്‍ ശിക്ഷിക്കപ്പെടുന്ന സംവിധാനം നിലവില്‍ കൊണ്ടു വരണമെന്നും അദ്ദേഹം ആവശ്യപ്പെട്ടു. സൗമ്യ വധക്കേസിലെ പ്രതി ഗോവിന്ദച്ചാമിക്കു വേണ്ടി വാദിക്കാന്‍ അഭിഭാഷകര്‍ തയ്യാറാകുന്നത് വേദനാജനകമാണെന്നും അദ്ദേഹം പറഞ്ഞു.



ഉപ്പളയില്‍ എസ്.വൈ.എസ് സൗജന്യ സംഭാര വിതരണം ജനകീയമാവുന്നു

ഉപ്പള: ജലമാണ് ജീവന്‍ എന്ന ശീര്‍ഷകത്തില്‍ എസ്.വൈ.എസ് സംസ്ഥാന വ്യാപകമായി നടത്തുന്ന ജല ബോധവത്കരണ ക്യാമ്പയില്‍ ഭാഗമായി ഉപ്പള സോണിലെ സുന്നി സംഘടനകളുടെ സംയുക്താഭിമുഖ്യത്തില്‍ ഉപ്പള ബസ്റ്റാന്റില്‍ ഒരാഴ്ച മുമ്പ് തുടക്കം കുറിച്ച സൗജന്യ സംഭാര വിതരണം കൂടുതല്‍ ജനകീയമായി. ദിവസവും ആയിരത്തി അഞ്ഞൂറിനടുത്ത് ആളുകള്‍ ദാഹം തീര്‍ക്കാന്‍ ഉപ്പള സ്റ്റാന്റിലെ എസ്.വൈ.എസ് തണ്ണീര്‍ പന്തലിലെത്തുന്നു. ഇതിനകം പതിനായിരത്തിലേറെ ആളുകള്‍ക്ക് സൗജന്യമായി സംഭാരം വിതരണം ചെയ്തു കഴിഞ്ഞു. ഈ മാസം 20 വരെ വിതരണം തുടരും.

വിവിധ ആവശ്യങ്ങള്‍ക്ക് നഗരത്തിലെത്തുന്നവരും ഡ്രൈവര്‍മാരും മറ്റു തൊഴിലാളകളും സേവനം ഉപയോഗപ്പെടുത്തുന്നു. കടുത്ത വേനല്‍ ചൂടില്‍ ഉപ്പള ടൗണിലെത്തുന്നവര്‍ക്ക് ഏറെ ആശ്വാസമാണ് എസ്.വൈ.എസിന്റെ ഈ സംരംഭം. ജല സംരക്ഷണത്തിന്റെ പ്രാധാന്യം വ്യക്തമാക്കുന്ന കാല്‍ ലക്ഷം ലഘുലേഖയും ഇതോടനുബന്ധിച്ച് വിതരണം ചെയ്യുന്നു.

പദ്ധതിയുടെ പുരോഗതി വിലയിരുത്തുന്നതിനായി എസ്.വൈ.എസ് ജില്ലാ പ്രസിഡന്റ് സയ്യിദ് പി.എസ് ആറ്റക്കോയ തങ്ങള്‍, ജില്ലാ ഫിനാന്‍സ് സെക്രട്ടറി ബശീര്‍ പുളിക്കൂര്‍, കേരള മുസ്ലിം ജമാഅത്ത് ജില്ലാ സെക്രട്ടറി സുലൈമാന്‍ കരിവെള്ളൂര്‍ എന്നിവര്‍ കഴിഞ്ഞ ദിവസം ഉപ്പളയിലെ വിതരണ കൗണ്ടര്‍ സന്ദര്‍ശിച്ചു. എസ്.വൈ.എസ് സോണ്‍ പ്രസിഡന്റ് സിദ്ദീഖ് സഖാഫി ബായാര്‍, ശാഫി സഅദി ഷിറിയ, മുഹമ്മദ് മണ്ണംകുഴി തുടങ്ങിയവര്‍ ചേര്‍ന്ന് സ്വീകരിച്ചു. എസ്.വൈ.എസ്, എസ്.എസ്.എഫ് വളണ്ടിയര്‍ വിഭാഗം പദ്ധതി വിജയത്തിന് രംഗത്തുണ്ട്. വാര്‍ട്‌സ് അപ് കൂട്ടായ്മയിലൂടെയാണ് പദ്ധതിക്ക് തുക കണ്ടെത്തുന്നത്.






കുമ്പളയില്‍ ബസ് യാത്രക്കാരിയുടെ ബാഗ് മുറിച്ച് നാലു പവന്‍ സ്വര്‍ണ്ണവും 10000 രൂപയും കവര്‍ന്നു

കുമ്പള: ബസ് യാത്രക്കാരിയുടെ ബാഗ് ബ്ലേഡുകൊണ്ട് മുറിച്ച് 10000 രൂപയും നാലു പവന്‍ സ്വര്‍ണ്ണവും തട്ടിയെടുത്തു. പെര്‍ള, ദേവികൃപ നിവാസിലെ ശ്രീജയുടെ പണവും സ്വര്‍ണ്ണവുമാണ് നഷ്ടമായത്. സംഭവത്തില്‍ കുമ്പള പൊലീസ് കേസെടുത്ത് അന്വേഷണം ആരംഭിച്ചു. കഴിഞ്ഞ ദിവസം രാവിലെ സ്വകാര്യ ബസില്‍ കുമ്പളയിലേയ്ക്കു യാത്ര ചെയ്യുന്നതിനിടയിലാണ് സംഭവം. കുമ്പള ടൗണില്‍ ബസിറങ്ങിയപ്പോഴാണ് ബാഗുകീറിമുറിച്ച നിലയില്‍ കാണപ്പെട്ടത്. തുടര്‍ന്ന് നോക്കിയപ്പോഴാണ് പണവും സ്വര്‍ണ്ണവും നഷ്ടപ്പെട്ട വിവരം അറിഞ്ഞത്.


ഉളിയത്തടുക്കയില്‍ പെട്ടിക്കടക്ക് തീവെച്ചു

വിദ്യാനഗര്‍: ഉളിയത്തടുക്കയില്‍ പെട്ടിക്കടക്ക് തീവെച്ചു. ഉളിയത്തടുക്കയിലെ ചന്ദ്രന്റെ പെട്ടിക്കടക്കാണ് അജ്ഞാതസംഘം തീവെച്ചത്. ബുധനാഴ്ച പുലര്‍ച്ചെ 4.15 മണിയോടെയാണ് സംഭവം. പെട്ടിക്കട കത്തുന്നത് ശ്രദ്ധയില്‍പെട്ട പരിസരവാസികള്‍ ചന്ദ്രനെ വിവരമറിയിക്കുകയായിരുന്നു.

കാസര്‍കോട് ഫയര്‍ഫോഴ്സ് സ്ഥലത്തെത്തിയാണ് തീയണച്ചത്. പെട്ടിക്കടക്ക് തീയിട്ടതാണെന്ന് പോലീസിന് സൂചന ലഭിച്ചിട്ടുണ്ട്. ഇതുസംബന്ധിച്ച് വിദ്യാനഗര്‍ പോലീസ് വിശദമായ അന്വേഷണം തുടങ്ങി.

പതിനാറുകാരിയെ പീഡിപ്പിക്കാന്‍ ശ്രമിച്ച മധ്യവയസ്‌കന്‍ അറസ്റ്റില്‍

കുമ്പള: കൂടെ താമസിപ്പിച്ചിരുന്ന സ്ത്രീയുടെ പതിനാറുകാരിയായ മകളെ പീഡിപ്പിക്കുവാന്‍ ശ്രമിച്ചുവെന്ന കേസില്‍ ഒളിവിലായിരുന്ന യുവാവിനെ പൊലീസ് അറസ്റ്റു ചെയ്തു. ബേള, ഉള്ളോടിയിലെ ചെടേക്കല്‍ ഹൗസില്‍ ചോമ എന്ന സോമ (47)നെയാണ് കുമ്പള എസ്.ഐ മെല്‍വിന്‍ ജോസിന്റെ നേതൃത്വത്തില്‍ അറസ്റ്റു ചെയ്തത്. ഒളിവിലായിരുന്ന പ്രതി കുമ്പളയിലേക്ക് ബസില്‍ എത്തുന്നുണ്ടെന്ന വിവരത്തിന്റെ അടിസ്ഥാനത്തില്‍ നടത്തിയ നീക്കത്തിലാണ് പ്രതി പിടിയിലായത്.

മൊഗ്രാല്‍ കൊപ്ര ബസാറിലെ വാടക കെട്ടിടത്തില്‍ താമസിച്ച് ടാറിംഗ് ജോലിക്കു പോകുന്ന കര്‍ണ്ണാടക സ്വദേശിനിയായ സ്ത്രീയുടെ മകളാണ് പരാതിക്കാരി. 2015 ആഗസ്ത് 18ന് ആണ് കേസിനാസ്പദമായ സംഭവം. വീട്ടില്‍ മാതാവില്ലാത്ത സമയത്ത് പെണ്‍കുട്ടിയെ പീഡിപ്പിക്കുവാന്‍ ശ്രമിച്ചുവെന്നാണ് പരാതി. കേസില്‍ പ്രതിയായതോടെ ഒളിവിലായിരുന്നു ചോമ.

ഖത്മുല്‍ ബുഖാരി ആത്മീയ സമ്മേളനം മെയ് 12ന് മര്‍കസില്‍

കോഴിക്കോട്: മെയ് 10,11,12 തിയ്യതികളില്‍ നടക്കുന്ന അന്താരാഷ്ട്ര സഖാഫി സമ്മേളനത്തിന്റ സമാപനമായി മെയ് 12ന് രാവിലെ 10 മണിക്ക് സമ്പൂര്‍ണ സഖാഫി സംഗമവും വൈകുന്നേരം 4 മണിക്ക് ഖത്മുല്‍ ബുഖാരി ആത്മീയ സമ്മേളനവും നടക്കും. വിവിധ രാജ്യങ്ങളില്‍ നിന്നുള്ള സൂഫീവര്യന്മാരും സയ്യിദന്മാരും പണ്ഡിതന്മാരും സമ്മേളനത്തില്‍ സംബന്ധിക്കും. ഖത്മുല്‍ ബുഖാരി ആത്മീയ സമ്മേളനത്തിന്റെ പ്രവര്‍ത്തനങ്ങള്‍ക്ക് സംഘാടക സമിതി രൂപീകരിച്ചു. കാന്തപുരം എ.പി അബൂബക്കര്‍ മുസ്‌ലിയാരുടെ അധ്യക്ഷതയില്‍ ചേര്‍ന്ന യോഗം സി. മുഹമ്മദ് ഫൈസി ഉദ്ഘാടനം ചെയ്തു. ഡോ. എപി അബ്ദുല്‍ ഹകീം അസ്ഹരി പദ്ധതി അവതരിപ്പിച്ചു. കെ.കെ അഹ്മദ്കുട്ടി മുസ്‌ലിയാര്‍, വി.പി.എം ഫൈസി വില്യാപള്ളി, ഡോ. ഹുസൈന്‍ സഖാഫി ചുള്ളിക്കോട്, സി.പി ഉബൈദുള്ള സഖാഫി, പത്തപ്പിരിയം അബ്ദുല്‍റഷീദ് സഖാഫി, ഉമര്‍ഹാജി കാരന്തൂര്‍, അബ്ദുല്ലത്തീഫ് സഖാഫി പെരുമുഖം, മുഹമ്മദ് നൂറാനി വള്ളിത്തോട് തുടങ്ങിയവര്‍ സംബന്ധിച്ചു. തറയിട്ടാല്‍ ഹസന്‍ സഖാഫി സ്വാഗതവും ശംവീല്‍ നൂറാനി നന്ദിയും പറഞ്ഞു.

ലക്നോ സര്‍വകലാശാലയില്‍ മാംസാഹാരം നിരോധിച്ചു

ലക്നോ: ഉത്തര്‍ പ്രദേശിലെ ലക്നോ അംബേദ്കര്‍ സര്‍വകലാശാലാ കാന്റീനില്‍ മാംസ ഭക്ഷണങ്ങള്‍ നിരോധിച്ചു. മാട്ടിറച്ചി കഴിച്ചത് ആരോഗ്യത്തിന് ഗുണകരമായി എന്ന് ദളിത് ചിന്തകന്‍ കാഞ്ച എലയ്യ ഹൈദരാബാദിലെ ഉസ്മാനിയ സര്‍വകലാശാലിയില്‍ നടത്തിയ പ്രസ്താവന സംഘര്‍ഷങ്ങള്‍ക്ക് ഇടവരുത്തിയിരുന്നു. ഇത് പരിഗണിച്ചാണ് ലക്നോ സര്‍വകലാശാലയില്‍ മാംസാഹാരം നിരോധിച്ചത് എന്നാണ് ഔദ്യോഗിക വിശദീകരണം.

കാഞ്ച എലയ്യയുടെ പ്രസ്താവനക്ക് പിന്നാലെ കഴിഞ്ഞ മാസം 14 മുതല്‍ ലക്നോ സര്‍വകലാശാലയിലും പ്രതിഷേധങ്ങള്‍ നടന്നുവരികയായിരുന്നു. ഇത് കണക്കിലെടുത്ത് സര്‍വകലാശാലാ കാന്റീനില്‍ സസ്യ ആഹാരം മാത്രം വിളമ്പിയാല്‍ മതിയെന്ന് അധികൃതര്‍ തീരുമാനിക്കുകയായിരുന്നു. പ്രത്യേക സാഹചര്യങ്ങളില്‍ മാംസാഹാരം അനുവദിക്കുമെന്ന ആവശ്യം അംഗീകരിക്കാന്‍ കഴിയില്ലെന്നും സര്‍വകലാശാലാ വക്താവ് കമല്‍ ജെയ്സ്വാള്‍ പറഞ്ഞു.

സര്‍വകലാശാല തീരുമാനത്തിനെതിരെ വ്യാപക പ്രതിഷേധമാണ് ഉയര്‍ന്നിരിക്കുന്നത്. ദളിത്വിരുദ്ധ തീരുമാനം പിന്‍വലിച്ച് സര്‍വകലാശാലാ കാന്റീനില്‍ മാംസാഹാരം വിളമ്പണമെന്നാവശ്യപ്പെട്ട് ഇരുനൂറോളം വരുന്ന വിദ്യാര്‍ഥികള്‍ ഇന്നലെ ക്യാമ്പസില്‍ മാര്‍ച്ച് നടത്തി. വിദ്യാര്‍ഥികള്‍ എന്ത് ഭക്ഷിക്കണമെന്ന് സര്‍വകലാശാലയല്ല തീരുമാനിക്കേണ്ടതെന്നും തീരുമാനം ജനാധിപത്യവിരുദ്ധമാണെന്നും കോണ്‍ഗ്രസ് നേതാവ് ദ്വിജേന്ദ്ര ത്രിപാഠി പറഞ്ഞു. അതേസമയം, ക്യാമ്പസില്‍ സമാധാനാന്തരീക്ഷം തകര്‍ക്കുന്ന നീക്കങ്ങള്‍ തടയുക എന്നത് സര്‍വകലാശാലയുടെ ഉത്തരവാദിത്വമാണെന്ന് പറഞ്ഞ് മാംസാഹാര നിരോധത്തെ ബി ജെ പി വക്താവ് വിജയ് ബഹദൂര്‍ പഥക് ന്യായീകരിച്ചു.

ഉന്നത വിജയം നേടിയവരെ അനുമോദിച്ചു



ഷാര്‍ജ: ഡല്‍ഹി ആസ്ഥാനമായി പ്രവര്‍ത്തിക്കുന്ന ഇസ്ലാമിക് എജുകേഷന്‍ ബോര്‍ഡ് ഓഫ് ഇന്ത്യ പൊതു പരീക്ഷയില്‍ ഷാര്‍ജ അബ്ദുറഹ്മാന്‍ ബിന് ഔഫ് മദ്രസ്സയില്‍ നിന്നും ഉന്നത വിജയം നേടിയ വിദ്യാര്‍ഥികളെ മദ്രസ്സ മാനേജ്‌മെന്റ് കമ്മിറ്റി അനുമോദിച്ചു. അഞ്ചാം ക്ലാസ്സില്‍ യു എ ഇ തലത്തില്‍ രണ്ടാം റാങ്ക് നേടിയ ലിയ ഖദീജ മുനീറിന് മര്‍ഹൂം അബ്ദുലതീഫ് ഹാജി സ്മാരക സ്വര്‍ണ്ണ പതക്കം പ്രസിഡണ്ട് ഇ .പി .സുലൈമാന്‍ ഹാജി (ഫാത്തിമ ഗ്രൂപ്പ് ) സമ്മാനിച്ചു. മറ്റു ഡിസ്റ്റിംഗ്ഷന്‍ നേടിയ വിദ്യാര്‍ഥികളായ ഫാദില്‍ മുഹമ്മദ് റാഫി (അഞ്ചാം ക്ലാസ്സ്), ഇല്‍ഹാന്‍ സമീല്‍, മുഹമ്മദ് അജ്മല്‍, മുഹമ്മദ് സയാന്‍ (ഏഴാം ക്ലാസ്സ്) എന്നീ വിദ്യാര്‍ഥികള്‍ക്ക് യഥാക്രമം അബ്ദുല്‍ കരീം ഹാജി, ഇസ്മായില്‍ ഹാജി നോബ്ള്‍, സീലാന്‍ഡ് മുനീര് ഹാജി, കബീര്‍ തെറ്റിയില്‍, അഫി അഹമദ് എന്നിവര് അവാര്‍ഡുകള്‍ വിതരണം ചെയ്തു. സി എം എ കബീര്‍ മാസ്റ്റര്‍, അബ്ദുല്‍ ഖാദിര്‍ സഖാഫി, മുനീര്‍ മാഹി, പി കെ മുഹമ്മദ് മാസ്റ്റര്‍, എ .കെ അബ്ദുല്‍ ഹകീം സംബന്ധിച്ചു. നാളയുടെ നായകന്മാരായി വളരുന്ന വിദ്യാര്‍ഥികള്‍ ധാര്‍മിക വിദ്യയിലൂടെ അവരുടെ മികവേറിയ കഴിവുകള്‍ പ്രകടിപ്പിക്കുന്നത് പ്രശംസനീയമാണെന്നും കുറഞ്ഞ കാലം കൊണ്ട് ഉന്നത വിജയം നേടുന്ന സ്ഥാപനമായി മാറിയ അബ്ദുറഹ്മാന്‍ബിന് ഔഫ് മദ്രസ്സയിലെ പഠനം ശ്ലാഘനീയമാണെന്നും ആശംസ പ്രാസംഗികര്‍ അഭിപ്രായപെട്ടു.

എസ് വൈ എസ് ഉദുമ സോണ്‍ കാബിനറ്റ് മീറ്റ് വ്യാഴാഴ്ച

പെരിയാട്ടടുക്കം: എസ് വൈ എസ് ഉദുമ സോണ്‍ കാബിനറ്റ് മീറ്റ് വ്യാഴാഴ്ച (05-05-16) വൈകിട്ട് 4മണിക്ക് പെരിയാട്ടടുക്കം സുന്നി സെന്ററില്‍ നടക്കും. സോണ്‍ പ്രസിഡന്റ് ബി കെ അഹമ്മദ് മുസ്ലിയാര്‍ കുണിയയുടെ അധ്യക്ഷതയില്‍ ജില്ലാ സെക്രട്ടറി അശ്‌റഫ് കരിപ്പൊടി ഉദ്ഘാടനം നിര്‍വഹിക്കും. സ്വഫ് വ പുനഃക്രമീകരണം, ജല കാമ്പയിന്‍, തുടങ്ങിയവ ചര്‍ച്ച ചെയ്യും. മഹമ്മൂദ് ജീലാനി ബാഖവി, ആബിദ് സഖാഫി മവ്വല്‍, അബ്ദുല്‍ സലാം ചെമ്പിരിക്ക, ഷാഫി ബി എ കുണിയ, ബശീര്‍ ഹിമമി സഖാഫി പെരുമ്പള, ഫൈസല്‍ ഉദുമ, ഖാലിദ് പുത്തരിയടുക്കം തുടങ്ങിയവര്‍ സംബന്ധിക്കും ഷാനവാസ് മദനി സ്വാഗതവും മജീദ് മവ്വല്‍ നന്ദിയും പറയും
 
Copyright © 2013. Muhimmath - All Rights Reserved