ന്യൂഡല്ഹി: ഇന്ത്യയില് ഓരോ എട്ടു മിനിറ്റിലും ഒരു കുട്ടിയെ കാണാതാകുന്നതായി കണക്കുകള്. അന്താരാഷ്ട്ര വാര്ത്താ ചാനലായ സിഎന്എന് ആണ് കണക്കുകളുടെയും തെളിവുകളുടെയും അടിസ്ഥാനത്തില് ഇത് റിപ്പോര്ട്ട് ചെയ്തിരിക്കുന്നത്. കാണാതായ കുട്ടികളുടെ മാതാപിതാക്കളുടെ പരാതികള് അധികാര കേന്ദ്രങ്ങളില് എത്താതെ പോകുന്നതിനെ കുറിച്ചും സിഎന്എന് റിപ്പോര്ട്ട് സൂചിപ്പിക്കുന്നു.
സ്ത്രീകള്ക്കെതിരെ അതിക്രമങ്ങള് വര്ധിച്ചു വരുന്ന സാഹചര്യത്തില് സര്ക്കാര് നിയമങ്ങളും നടപടികളും ശക്തിപ്പെടുത്തുകയും ചെയ്യുമ്പോഴും രാജ്യതലസ്ഥാനമായ ഡല്ഹിയില് മാത്രം 700 കുട്ടികളിലേറെയാണ് ഈ വര്ഷം കാണാതായിരിക്കുന്നത്.
ഡല്ഹിയില് അഞ്ചു വയസുകാരി പീഡിപ്പിക്കപ്പെട്ടത് വെളിച്ചത്തില് വന്നതോടെ പോലീസ് ഉള്പ്പെടെയുള്ള അധികൃതരുടെ നിസംഗത ജനങ്ങളുടെ മുന്നില് തുറന്ന് കാണിക്കപ്പെട്ടതായും റിപ്പോര്ട്ട് ചൂണ്ടിക്കാട്ടുന്നു.
അതേസമയം കാണാതായ കുട്ടികളെ കണ്ടെത്തുന്നതിനും കൂടുതല് തിരോധാനങ്ങള് തടയുന്നതിനും പോലീസിന്റെ പ്രവര്ത്തന രീതികളില് മാറ്റം വരുത്തി കൊണ്ട് ഇരിക്കുകയാണെന്ന് ഡപ്യൂട്ടി ഇന്സ്പെക്ടര് ജനറല് ഓഫ് പോലീസ് രവീന്ദ്ര യാദവ് പറയുന്നു.
രാജ്യത്തിന്റെ വിവിധ ഭാഗങ്ങളില് നിന്നായി കാണാതാകുന്ന കുട്ടികളില് 40 ശതമാനവും ലൈംഗീക പീഡനത്തിന് ഇരയാകുന്നു. മിക്ക കുട്ടികളെയും പിന്നീട് പോലീസിനോ വീട്ടുക്കാര്ക്കോ കണ്ടെത്താന് സാധിക്കുന്നില്ല. കാണാതാകുന്ന കുട്ടികള് പിന്നീട് എത്തിച്ചേരുന്നത് ലൈംഗീക തൊഴിലിലോ ഫാക്ടറികളിലോ ആയിരിക്കുമെന്നും റിപ്പോര്ട്ടില് പറയുന്നു.
കാണാതാകുന്ന കുട്ടികളെ കണ്ടെത്തുന്നതിനായി സാമൂഹ്യ പ്രവര്ത്തകനായ കൈലേഷ് സത്യാര്ത്ഥി സ്ഥാപിച്ച ബച്ച്പന് ബച്ചാവോ ആന്ദോളന് ചതിയില് അകപ്പെട്ട 18,000 കുട്ടികളെ രക്ഷിച്ചിട്ടുണ്ടെന്ന് പറയുന്നു.
സമൂഹത്തില് ഉന്നത സ്ഥാനക്കാരായ ആളുകളുടെ മക്കളെ കാണാതായാല് പോലീസ് ഉടനടി നടപടിയെടുക്കുകയും കുട്ടികളെ കണ്ടെത്തുകയും ചെയ്യും, എന്നാല് സാമ്പത്തികമായി പിന്നോക്കം നില്ക്കുന്ന ആളുകളുടെ കുട്ടികളെ കാണാതായാല് പോലീസ് നിഷ്ക്രിയരാണെന്നും കൈലേഷ് കുറ്റപ്പെടുത്തുന്നു.
സ്ത്രീകള്ക്കെതിരായ അക്രമങ്ങള് തടയുന്നതിനായി സര്ക്കാര് നിയമ നിര്മ്മാണം നടത്തിയിട്ടുണ്ടെങ്കിലും കാണാതാകുന്ന കുട്ടികളുടെ കാര്യത്തില് നിയമവും സര്ക്കാരും പോലീസും മൗനം പാലിക്കുകയാണെന്നും സിഎന്എന് റിപ്പോര്ട്ട് ചൂണ്ടിക്കാട്ടുന്നു.
Tags: missing child
