Latest News :
...
Latest Post

അധ്യാപകന്റെ കൊല: വ്യോമസേന ഉദ്യോഗസ്ഥന്‍ അറസ്റ്റില്‍

Written By Muhimmath News on Wednesday, 20 June 2018 | 20:41


ചെറുവത്തൂര്‍: നാലിലാംകണ്ടം ഗവ:യു .പി സ്‌കൂള്‍ അധ്യാപകനായ പി.ടി.രമേശനെ തലയ്ക്കടിച്ച് കൊലപ്പെടുത്തിയ കേസിലെ നാലാം പ്രതിയും വ്യോമസേന ഉദ്യോഗസ്ഥനുമായ അഭിജിത്ത് (20 ) നെ അന്വേഷണ സംഘം അറസ്റ്റ് ചെയ്തു. ബല്‍ഗാമിലെ വ്യോമസേന പരിശീലന കേന്ദ്രത്തില്‍ നിന്നാണ് ഇയാളെ അറസ്റ്റ് ചെയ്തത്. കോടതിയില്‍ ഹാജരാക്കിയ ഇയാളെ റിമാന്‍ഡ് ചെയ്തു. കഴിഞ്ഞ മാര്‍ച്ച് മൂന്നിന് രാത്രി വീടിനു സമീപത്ത് വെച്ചാണ് അധ്യാപകന് തലയ്ക്കടിയേറ്റത്. തുടര്‍ന്ന് ചികിത്സയ്ക്കിടെ മരിച്ചു.

സമീപവാസികളായ തമ്പാന്‍, ജയനീഷ്, അരുണ്‍, അഭിജിത്ത് എന്നിവരുടെ പേരില്‍ ചീമേനി പോലീസ് കേസെടുത്തിരുന്നു. തുടര്‍ന്ന് മൂന്ന് പേരെ അറസ്റ്റ് ചെയ്തു. മുഴുവന്‍ പ്രതികളെയും പിടികൂടാത്തതിനാല്‍ കുറ്റപത്രം സമര്‍പ്പിക്കാന്‍ കഴിയാതെ അന്വേഷണം നീളുന്നതിനിടയിലാണ് നാലാമത്തെ പ്രതിയെ പിടികൂടുന്നത്..

വ്യോമസേന ഉദ്യോഗസ്ഥനായ അഭിജിത്തിനെ അറസ്റ്റ് ചെയ്യാത്തത്തിനെ തുടര്‍ന്ന് അധ്യാപക സംഘടനയായ കെ.പി.എസ്.ടി.എ യുടെ നേതൃത്വത്തില്‍ കര്‍മസമിതി രൂപീകരിച്ച് പ്രതിഷേധ സമരങ്ങള്‍ നടത്തിയിരുന്നു. കഴിഞ്ഞ മാസം ചീമേനി പോലീസ് ബല്‍ഗാമിലെ വ്യോമസേനപരിശീലന ക്യാമ്പില്‍ പ്രതിയെ വിട്ടുകിട്ടുന്നതിനുള്ള നടപടി യുടെ ഭാഗമായി എത്തിയിരുന്നു. ഇതേ തുടര്‍ന്ന് ഒരാഴ്ച മുമ്പ് വ്യോമസേനയിലെ അന്വേഷണ വിഭാഗം ചീമേനിയിലെത്തിയിരുന്നു.

സ്ത്രീയെ ശല്യം ചെയ്യുന്നത് തടയാന്‍ ശ്രമിച്ച പൊലിസുകാരന് മര്‍ദനം; പ്രതി അറസ്റ്റില്‍


കാഞ്ഞങ്ങാട്: റെയില്‍വേ സ്റ്റേഷനില്‍ അന്യസംസ്ഥാന സ്ത്രീയെ ശല്യം ചെയ്യുന്നത് തടയാന്‍ ചെന്ന പൊലീസുകാരനെ തലയില്‍ വടികൊണ്ടടിച്ച് പരിക്കേല്‍പ്പിച്ചു. ഇന്ന് രാവിലെ 8.45ഓടെ കാഞ്ഞങ്ങാട് റെയില്‍വേ സ്റ്റേഷനിലാണ് സംഭവം. അന്യസംസ്ഥാന തൊഴിലാളിയുടെ അക്രമത്തില്‍ കാസര്‍കോട് എ.ആര്‍ ക്യാമ്പിലെ പൊലീസ് ഉദ്യോഗസ്ഥനായ മടിക്കൈ ചാളക്കടവ് പോത്തങ്കയിലെ റിട്ട. എസ്.ഐ ബാലന്റെ മകന്‍ വിനീഷി (27)നാണ് മര്‍ദനമേറ്റത്. സംഭവവുമായി ബന്ധപ്പെട്ട് ഒറീസ കന്തമാള്‍ ഉദയഗിരിയിലെ സഫേദ്കുമാര്‍ പ്രതാപ (30)നെതിരെ ഹൊസ്ദുര്‍ഗ് പൊലീസ് വധശ്രമത്തിന് കേസെടുത്ത് അറസ്റ്റു ചെയ്തു. 

റെയില്‍വേ സ്റ്റേഷനില്‍ ഇരിക്കുകയായിരുന്ന നാടോടി സ്ത്രീയെ ശല്യപ്പെടുത്തുകയായിരുന്ന സഫേദ് കുമാറിനെ തടയാന്‍ ചെന്ന യാത്രക്കാര്‍ക്കു നേരെ ഇയാള്‍ അക്രമാസക്തനാവുകയായിരുന്നു. ഇതുകണ്ട് റെയില്‍വേ സ്റ്റേഷനില്‍ ഡ്യൂട്ടിയിലുണ്ടായിരുന്ന വിനീഷ് കുമാര്‍ സ്ഥലത്തെത്തി സഫേദ് കുമാറിനെ കസ്റ്റഡിയിലെടുത്ത് എയ്ഡ് പോസ്റ്റില്‍ കൊണ്ടുപോയപ്പോഴാണ് മരവടി കൊണ്ട് വിനീഷിന്റെ തലക്കടിച്ച് പരിക്കേല്‍പ്പിച്ചത്. ജില്ലാ ആസ്പത്രിയില്‍ പ്രവേശിപ്പിച്ച വിനീഷിന്റെ തലക്ക് സാരമായ പരിക്കുണ്ട്. സഫ്ദാറിനെതിരെ ഔദ്യോഗിക കൃത്യനിര്‍വഹണം തടസപ്പെടുത്തല്‍, വധശ്രമം എന്നീ ജാമ്യമില്ലാ വകുപ്പ് പ്രകാരമാണ് കേസെടുത്തിരിക്കുന്നത്.

പ്ലസ് വണ്‍ പ്രവേശനത്തിന് അന്യായ ഫീസ്: കാഞ്ഞങ്ങാട് ഇഖ്ബാല്‍ സ്‌കൂളില്‍ എം.എസ്.എഫ് അഡ്മിഷന്‍ തടഞ്ഞു


കാഞ്ഞങ്ങാട്: ഏകജാലക പ്രകാരം പ്ലസ് വണ്‍ പ്രവേശനത്തിന് അര്‍ഹത നേടിയ വിദ്യാര്‍ത്ഥികളില്‍ നിന്നും സര്‍ക്കാര്‍ നിശ്ചയിച്ചതിലുമധികം അന്യായമായി ഫീസ് വാങ്ങുന്നതായി ആരോപിച്ച് കാഞ്ഞങ്ങാട് ഇഖ്ബാല്‍ ഹയര്‍സെക്കണ്ടറി സ്‌കൂളിലെ പ്ലസ്‌വണ്‍ പ്രവേശനം കാഞ്ഞങ്ങാട് മണ്ഡലം എം.എസ്.എഫ് നേതാക്കളുടെ നേതൃത്വത്തില്‍ തടഞ്ഞു. 650രൂപ മാത്രം നല്‍കേണ്ട വിദ്യാര്‍ത്ഥികളോട് 2500 രൂപ അന്യായമായി സ്‌കൂള്‍ മാനേജ്‌മെന്റും പി.ടി.എയും വാങ്ങുന്നതായി ആരോപിച്ചായിരുന്നു എം.എസ്.എഫ് പ്രവര്‍ത്തകര്‍ സ്‌കൂളിലെത്തി പ്രവേശന നടപടികള്‍ തടഞ്ഞത്. 


ഹൊസ്ദുര്‍ഗ് എസ്.ഐയുടെ സാനിധ്യത്തില്‍ പ്രിന്‍സിപ്പലുമായി നടത്തിയ ചര്‍ച്ചയില്‍ അനധികൃതമായി ഫീസ് വാങ്ങിയ മുഴുവന്‍ വിദ്യാര്‍ത്ഥികള്‍ക്കും ഫീസ് തിരിച്ചുനല്‍കി സര്‍ക്കാര്‍ നിശ്ചയിച്ച തുക മാത്രമെ ഈടാക്കൂ എന്ന ഉറപ്പിലാണ് എം.എസ്.എഫ് പ്രതിഷേധം അവസാനിപ്പിച്ചത്. എം.എസ്.എഫ് ജില്ലാ പ്രസിഡണ്ട് ആബിദ് ആറങ്ങാടി, മണ്ഡലം പ്രസിഡണ്ട് റമീസ് ആറങ്ങാടി, വൈസ് പ്രസിഡണ്ട് റംഷീദ് തോയമ്മല്‍, മുര്‍ഷിദ് ചിത്താരി, ഹാരിസ് ചിത്താരി, ഇഖ്ബാല്‍ വെള്ളിക്കോത്ത്, ജാബിര്‍, മുബാഷ് തെക്കെപുറം തുടങ്ങിയവര്‍ നേതൃത്വം നല്‍കി.


ജില്ലയിലെ പല എയ്ഡഡ് സ്‌കൂളുകളിലും പ്ലസ് വണ്‍ പ്രവേശനത്തിന് അന്യായമായി ഫീസ് വാങ്ങുന്നത് വിദ്യാഭ്യാസ വകുപ്പ് ഇടപ്പെട്ട് തടയണമെന്ന് ജില്ലാ എം.എസ്.എഫ് പ്രസിഡണ്ട് ആബിദ് ആറങ്ങാടി പത്രസമ്മേളനത്തില്‍ ആവശ്യപ്പെട്ടു. പ്ലസ് വണ്‍ പ്രവേശനത്തിന് സര്‍ക്കാര്‍ ഔദ്യോഗികമായി നിശ്ചയിച്ചിരുന്ന ഫീസ് വെറും 650 രൂപ മാത്രമായിരിക്കെ കാഞ്ഞങ്ങാട് ഇഖ്ബാല്‍ ഹയര്‍ സെക്കണ്ടറി സ്്കൂളിലടക്കം 1150രൂപ മുതല്‍ 2500 രൂപ വരെ വാങ്ങുന്ന നടപടി സര്‍ക്കാറും വിദ്യാഭ്യാസ വകുപ്പും ഇടപെട്ട് അവസാനിപ്പിക്കണം. അമിത ഫീസ് വാങ്ങുന്ന മാനേജ്‌മെന്റുകള്‍ക്കെതിരെ എം.എസ്.എഫ് എന്നും സമരത്തിലാണ്. മെറിറ്റില്‍ പ്രവേശനം നേടിയ കുട്ടികളില്‍ നിന്ന് ഭീമമായ പണം വാങ്ങുന്ന മനേജ്‌മെന്റുകള്‍ അതിന് തക്ക രശീതികള്‍ പോലും നല്‍കുന്നില്ല. ഇത്തരം അനീതിക്കെതിരെ ശക്തമായ സമരപരിപാടികളുമായി മുന്നോട്ടുപോകാന്‍തന്നെയാണ് എം.എസ്.എഫിന്റെ തീരുമാനമെന്ന് ആബിദ് ആറങ്ങാടി കൂട്ടിച്ചേര്‍ത്തു. പത്രസമ്മേളനത്തില്‍ മണ്ഡലം പ്രസിഡണ്ട് റമീസ് ആറങ്ങാടി, വൈസ് പ്രസിഡണ്ട് റംഷീദ് തോയമ്മല്‍ സംബന്ധിച്ചു.

കേന്ദ്ര സര്‍ക്കാറിന്റെ മുഖ്യസാമ്പത്തിക ഉപദേഷ്ടാവ് അരവിന്ദ് സുബ്രഹ്മണ്യന്‍ രാജിവച്ചു


ന്യൂഡല്‍ഹി: കേന്ദ്ര സര്‍ക്കാറിന്റെ മുഖ്യസാമ്പത്തിക ഉപദേഷ്ടാവ് അരവിന്ദ് സുബ്രഹ്മണ്യന്‍ രാജിവച്ചു. വ്യക്തിപരമായ ആവശ്യങ്ങളാല്‍ രാജിവെക്കുന്നുവെന്നാണ് അദ്ദേഹം നല്‍കുന്ന വിശദീകരണം. ധനമന്ത്രി അരുണ്‍ ജെയ്റ്റ്‌ലി ഫേസ്ബുക്ക് പോസ്റ്റിലൂടെയാണ് രാജിക്കാര്യം അറിയിച്ചത്. കുടുംബപരമായ കാരണങ്ങള്‍കൊണ്ട് യുഎസിലേക്ക് മടങ്ങിപ്പോകണമെന്നും അതിനാല്‍ തന്നെ സാമ്പത്തിക ഉപദേഷ്ടാവ് സ്ഥാനത്ത് നിന്ന് ഒഴിവാക്കിത്തരണമെന്നും അരവിന്ദ് സുബ്രഹ്മണ്യന്‍ ആവശ്യപ്പെട്ടിരുന്നതായും ഇത് അംഗീകരിക്കുകയല്ലാതെ മറ്റ് മാര്‍ഗമില്ലായിരുന്നുവെന്നും ജെയ്റ്റ്‌ലി കൂട്ടിച്ചേര്‍ത്തു.



പീറ്റേഴ്‌സണ്‍ ഇന്‍സ്റ്റിറ്റ്യൂട്ട് ഫോര്‍ ഇന്റര്‍നാഷണല്‍ എക്കണോമിക്‌സില്‍ സീനിയര്‍ ഫെല്ലോ ആയ സുബ്രഹ്മണ്യന്‍ മോദി സര്‍ക്കാര്‍ അധികാരമേറ്റെടുത്തതിന് പിന്നാലെ 2014 ഒക്ടാബറിലാണ് മുഖ്യസാമ്പത്തിക ഉപദേഷ്ടാവായി ചുമതലയേറ്റെടുത്തത്. 2017 ഒക്ടോബര്‍ പതിനാറിന് മൂന്ന് വര്‍ഷത്തെ കാലാവധി അവസാനിച്ചുവെങ്കിലും പിന്നീട് ഒരു വര്‍ഷത്തേക്ക് കൂടി നീട്ടുകയായിരുന്നു. ഇദ്ദേഹത്തിന്റെ കാലത്താണ് ഇന്ത്യയില്‍ നോട്ട് നിരോധനം നടപ്പാക്കിയത്. നോട്ട് നിരോധനവുമായി ബന്ധപ്പെട്ട് അരവിന്ദ് സുബ്രഹ്മണ്യവും കേന്ദ്രസര്‍ക്കാറും തമ്മില്‍ നിലനിന്നിരുന്ന അസ്വാരസ്യങ്ങളാണ് രാജിക്ക് കാരണമെന്നും സ്ഥിരീകരിക്കാത്ത റിപ്പോര്‍ട്ടുകളുണ്ട്.


നേരത്തെ, ബിജെപി നേതാക്കള്‍ തന്നെ അരവിന്ദ് സുബ്രഹ്മണ്യനെ വിമര്‍ശിച്ച് രംഗത്തെത്തിയിരുന്നു. അരവിന്ദ് സുബ്രഹ്മണ്യനെ പുറത്താക്കണമെന്ന് ബിജെപി എംപി സുബ്രഹ്മണ്യന്‍ സ്വാമി ആവശ്യപ്പെട്ടിരുന്നു. അരവിന്ദ് സുബ്രഹ്മണ്യന്‍ ഇന്ത്യന്‍ പൗരനാണോ എന്നു പോലും വ്യക്തമല്ലെന്നും അദ്ദേഹത്തിന് അമേരിക്കന്‍ ഗ്രീന്‍ കാര്‍ഡുണ്ടെന്നും ആരോപിച്ച സ്വാമി അരവിന്ദിന്റെ നിലപാടുകള്‍ സര്‍ക്കാര്‍ നയങ്ങള്‍ പരാജയപ്പെടാന്‍ കാരണമാകുമെന്നും മുഖ്യ സാമ്പത്തിക ഉപദേഷ്ടാവ് സ്ഥാനത്തിരിക്കാന്‍ അദ്ദേഹം യോഗ്യനല്ലെന്നും പറഞ്ഞിരുന്നു. അരവിന്ദ് സ്ഥാനം ഏറ്റെടുക്കുന്നതിന് മുന്‍പ് രഘുറാം രാജനായിരുന്നു ഈ തസ്തികയില്‍. 2013 സെപ്തംബറില്‍ അദ്ദേഹം സ്ഥാനം ഒഴിയുകയും ചെയ്തിരുന്നു. ആര്‍ബിഐ ഗവര്‍ണര്‍ സ്ഥാനം ഏറ്റെടുക്കുന്നതിനാണ് അന്ന് അദ്ദേഹം രാജിവെച്ചത്.

കാണാതായ വൃദ്ധനെ കിണറ്റില്‍ മരിച്ച നിലയില്‍ കണ്ടെത്തി

   
മഞ്ചേശ്വരം: കാണാതായ വൃദ്ധനെ കിണറ്റില്‍ മരിച്ച നിലയില്‍ കണ്ടെത്തി. പാവൂരിലെ ലിയോ മണ്‍തോര (62)യെയാണ് വീട്ടുപറമ്പിലെ കിണറ്റില്‍ മരിച്ച നിലയില്‍ കണ്ടെത്തിയത്. ചൊവ്വാഴ്ച വൈകിട്ട് മുതല്‍ ലിയോയെ കാണാനില്ലായിരുന്നു. പോലീസില്‍ പരാതിയും നല്‍കിയിരുന്നു. 

അന്വേഷണത്തിനിടെയാണ് ബുധനാഴ്ച രാവിലെ കിണറ്റില്‍ മരിച്ച നിലയില്‍ കണ്ടെത്തിയത്. പരേതരായ ഇന്‍സ മണ്‍തേര-താര ദമ്പതികളുടെ മകനാണ്. അവിവാഹിതനാണ്. മഞ്ചേശ്വരം പോലീസ് ഇന്‍ക്വസ്റ്റ് നടത്തിയ മൃതദേഹം പോസ്റ്റുമോര്‍ട്ടത്തിനായി മംഗല്‍പാടി ആശുപത്രിയിലേക്ക് മാറ്റിയിട്ടുണ്ട്.

കേരള എന്‍ട്രന്‍സ് ഫലം പ്രഖ്യാപിച്ചു.


തിരുവനന്തപുരം: എന്‍ജിനീയറിംഗ്, മെഡിക്കല്‍, ഫാര്‍മസി കോഴ്‌സുകളിലേക്ക് പ്രവേശനത്തിനായുള്ള സംസ്ഥാന റാങ്ക് പട്ടിക പ്രസിദ്ധീകരിച്ചു. എന്‍ജിനീയറിംഗ്് വിഭാഗത്തില്‍ ഒന്നാം റാങ്ക് കോട്ടയം സ്വദേശി അമല്‍ മാത്യുവും കൊല്ലം സ്വദേശി ശബരി കൃഷ്ണ എം. രണ്ടാം റാങ്കും നേടി.

മെഡിക്കല്‍ വിഭാഗത്തില്‍ ഒന്നാം റാങ്ക് അങ്കമാലി സ്വദേശി ജെസ് മെരിയ ബെന്നി (നീറ്റ് 56), രണ്ടാം റാങ്ക് തിരുവനന്തപുരം സ്വദേശി സംറീന്‍ ഫാത്തിമ ആര്‍(നീറ്റ് 89),മൂന്നാം റാങ്ക് കോഴിക്കോട് കൊടിയത്തൂര്‍ സ്വദേശി സേബാമ്മ മാളിയേക്കല്‍ (നീറ്റ് 99), നാലാം റാങ്ക് കോഴിക്കോട് സ്വദേശി ആറ്റ് ലിന്‍ ജോര്‍ജ് (നീറ്റ് 101), അഞ്ചാം റാങ്ക് കോട്ടയം മാന്നാനം സ്വദേശി മെറിന്‍ മാത്യു(നീറ്റ് 103) എന്നിവര്‍ നേടി.

എസ്‌സി വിഭാഗം ഒന്നാം റാങ്ക് കണ്ണൂര്‍ സ്വദേശി രാഹുല്‍ അജിത്ത്(നീറ്റ് 605), രണ്ടാം റാങ്ക് തിരുവനന്തപുരം സ്വദേശി ചന്ദന ആര്‍എസ്(നീറ്റ് 757). എസ്ടി വിഭാഗം ഒന്നാം റാങ്ക് കോഴിക്കോട് സ്വദേശി അമാന്‍ഡ എലിസബത്ത് സാം (നീറ്റ് 5494), രണ്ടാം റാങ്ക് തിരുവനന്തപുരം സ്വദേശി ആദര്‍ശ് ഗോപാല്‍(നീറ്റ് 6103) ഉം നേടി.എസ് സി വിഭാഗം ഒന്നാം റാങ്ക് കോഴിക്കോട് സ്വദേശി സമിക് മോഹന്‍, രണ്ടാം റാങ്ക് അക്ഷയ് കൃഷ്ണയും എസ്.ടി വിഭാഗം ഒന്നാം റാങ്ക് കാസര്‍കോട് സ്വദേശി പവന്‍ രാജ്, രണ്ടാം റാങ്ക് കാസര്‍കോട് സ്വദേശി ശ്രുതി കെ. എന്നിവര്‍ നേടി.

യുവതിയുടെ അശ്ലീല വീഡിയോ പ്രചരിപ്പിച്ച സംഭവം; ജില്ലാ പൊലീസ് മേധാവിക്ക് പരാതി


കാസര്‍കോട്: ഭര്‍തൃമതിയെ പരിചയക്കാരനായ യുവാവിനൊപ്പം നിര്‍ത്തി അശ്ലീല വീഡിയോ പകര്‍ത്തുകയും നവമാധ്യമങ്ങളില്‍ പ്രചരിപ്പിക്കുകയും ചെയ്ത സംഭവത്തില്‍ സമഗ്ര അന്വേഷണം ആവശ്യപ്പെട്ട് ജില്ലാ പൊലീസ് മേധാവിക്ക് പരാതി. മംഗല്‍പ്പാടി ഗ്രാമപഞ്ചായത്ത് പരിധിയില്‍ താമസിക്കുന്ന മുപ്പത്തിരണ്ടുകാരിയാണ് ഭര്‍തൃസഹോദരന്‍മാര്‍ക്കെതിരെ പരാതി നല്‍കിയത്. 2018 ഫെബ്രുവരി 22ന് ഒരു സംഘം ആളുകള്‍ യുവതിയുടെ വീട്ടില്‍ അതിക്രമിച്ചു കയറുകയും യുവതിയെ ഭീഷണിപ്പെടുത്തി അന്യസമുദായക്കാരനായ യുവാവിനൊപ്പം വീഡിയോ പകര്‍ത്തുകയും ചെയ്തുവെന്ന പരാതിയില്‍ 4 പേര്‍ക്കെതിരെ പൊലീസ് കേസെടുക്കുകയും ഒരാള്‍ അറസ്റ്റിലാവുകയും ചെയ്തിരുന്നു. യുവതിയുടെ കൈയിലുണ്ടായിരുന്ന 5000 രൂപ സംഘം തട്ടിയെടുക്കുകയും യുവാവിനെ ക്രൂരമായിമര്‍ദ്ദിക്കുകയും ചെയ്തിരുന്നുവത്രെ. മൊബൈല്‍ വീഡിയോയില്‍ പകര്‍ത്തിയ അശ്ലീല രംഗം പിന്നീട് നവമാധ്യമങ്ങളില്‍ പ്രചരിപ്പിക്കുകയും ചെയ്തു.

സംഭവത്തില്‍ പൊലീസ് കേസെടുത്തുവെങ്കിലും ഇതിന് പിന്നില്‍ ഭര്‍ത്താവിന്റെ സഹോദരന്മാരുടെ ഗൂഡാലോചനയാണെന്ന് വ്യക്തമായെന്നും തന്നെയും മക്കളെയും ഭര്‍ത്താവിനെയും വേര്‍തിരിപ്പിക്കാനാണ് ഇങ്ങനെ ചെയ്തതെന്നും യുവതി പരാതിയില്‍ പറയുന്നു. ഭര്‍തൃസഹോദരന്‍മാരെ കൂടി പ്രതിചേര്‍ത്ത് നടപടികള്‍ സ്വീകരിക്കണമെന്നാണ് പരാതിയിലുള്ളത്. ആഭ്യന്തര വകുപ്പിനും കാസര്‍കോട് ഡി.വൈ.എസ്.പി.ക്കും പരാതിയുടെ കോപ്പികള്‍ നല്‍കിയിട്ടുണ്ട്.

നല്ല വായന നല്ല നാളേക്ക്; മുഹിമ്മാത്തില്‍ വായനാ വാരം ഉദ്ഘാടനം ചെയ്തു

പുത്തിഗെ: നല്ല വായന നല്ല നാളേക്ക് എന്ന ശീര്‍ഷകത്തില്‍ പുത്തിഗെ മുഹിമ്മാത്ത് ഹയര്‍ സെക്കന്ററി സ്‌കൂളില്‍ നടന്നു വരുന്ന വായാനാ വാരാചരണത്തിന് തുടക്കമായി. കവി രവീന്ദ്രന്‍ പാടി തന്റെ അഞ്ച് കവിതാ സമാഹാരങ്ങള്‍ സ്‌കൂള്‍ ലൈബ്രറിക്ക് നല്‍കിക്കൊണ്ട് വാരാചരണം ഉദ്ഘാടനം ചെയ്തു. സ്‌കൂള്‍ മാനേജര്‍ സുലൈമാന്‍ കരിവെള്ളൂര്‍ മുഖ്യ പ്രഭാഷണം നടത്തി. 

ഹെഡ്മാസ്റ്റര്‍ അബ്ദുല്‍ ഖാദിര്‍ അധ്യക്ഷത വഹിച്ചു. 
വാരാചരണത്തിന്റെ ഭാഗമായി ക്വിസ് മത്സരം, പോസ്റ്റര്‍ പ്രദര്‍ശനം, സ്‌നേഹാലയ സന്ദര്‍ശനവും പഴയവായനയും, വായനാ മത്സരം തുടങ്ങിയവ നക്കും. പ്രിന്‍സിപ്പാള്‍ രൂപേഷ് എം.ടി.,ജിനേഷ്‌കുമാര്‍, സുമിത്ര, നീതു തുടങ്ങിയവര്‍ സംസാരിച്ചു. അഹ്മദ് സിദ്ദീഖ് സ്വാഗതവും സ്‌ററാഫ് സെക്രട്ടറി റാശിദ് നന്ദിയും പറഞ്ഞു.


നാല്‍പത് കിലോ കഞ്ചാവുമായി രണ്ട് കാസര്‍കോട് സ്വദേശികള്‍ മലപ്പുറത്ത് പിടിയില്‍

കാസര്‍കോട് : നാല്‍പത് കിലോ കഞ്ചാവുമായി രണ്ട് കാസര്‍കോട് സ്വദേശികള്‍ മലപ്പുറത്ത് പിടിയിലായി. മംഗല്‍പാടി സ്വദേശി മുഷ്താഖ് അഹമ്മദ് എന്ന മുത്തു (31), ഉപ്പള നാട്ടക്കല്‍ സ്വദേശി ഇബ്രാഹിം സിദ്ദീഖ് (26) എന്നിവരെയാണ് നിലമ്പൂര്‍ സി.ഐ കെ.എം. ബിജുവിന്റെ നേതൃത്വത്തിലുള്ള പോലീസ് സംഘം പിടികൂടിയത്. സംഘം സഞ്ചരിച്ച കാര്‍ കസ്റ്റഡിയിലെടുത്തിട്ടുണ്ട്.

അന്യ സംസ്ഥാനങ്ങളില്‍ നിന്നും കേരളത്തിലേക്ക് അതിര്‍ത്തികള്‍ വഴി ചെറുവാഹനങ്ങളില്‍ കഞ്ചാവു കടത്തുന്നുവെന്ന രഹസ്യവിവരത്തെ തുടര്‍ന്നാണ് പോലീസ് പരിശോധന നടത്തിയത്. നിലമ്പൂര്‍ കോടതിപ്പടി കൊളക്കണ്ടം റോഡില്‍ വെച്ചാണ് അറസ്റ്റ്. 

ആന്ധ്രാപ്രദേശില്‍ നിന്നും കുറഞ്ഞ വിലയ്ക്ക് വാങ്ങുന്ന കഞ്ചാവ് മംഗളൂരു, ഉഡുപ്പി എന്നിവിടങ്ങളിലും കേരളത്തിലെ വിവിധ കേന്ദ്രങ്ങളിലേക്കും എത്തിച്ചുകൊടുക്കുന്നതാണ് ഇവരുടെ രീതിയെന്ന് പോലീസ് പറഞ്ഞു. പ്രതികളെ നിലമ്പൂര്‍ കോടതിയില്‍ ഹാജരാക്കി.

ജനങ്ങള്‍ക്കിടയില്‍ പ്രവര്‍ത്തിക്കാന്‍ പൊലീസ് സുരക്ഷ ആവശ്യമില്ല, വ്യാജ വാര്‍ത്തകള്‍ പ്രചരിപ്പിക്കരുത്: കാന്തപുരം

കോഴിക്കോട്: തനിക്ക് പൊലീസ് ഉദ്യോഗസ്ഥരുടെ സുരക്ഷയില്ലെന്ന് കാന്തപുരം എപി അബുബുക്കര്‍ മുസ്ലിയാര്‍. പൊലീസിലെ രണ്ട് ഉദ്യോഗസ്ഥര്‍ സ്ഥിരമായി തന്റെ സുരക്ഷാ ജോലിയില്‍ ഏര്‍പ്പെട്ടതായി വാര്‍ത്തകള്‍ പ്രചരിക്കുന്നത് തെറ്റാണെന്നും അദ്ദേഹം ഫേസ്ബുക്ക് പോസ്റ്റില്‍ അറിയിച്ചു.

പൊലീസിലെ അടിമപ്പണി സംബന്ധിച്ച വാര്‍ത്തകള്‍ പുറത്തുവരുന്നതിനിടെ സാമുദായിക നേതാക്കളുടെ വീട്ടിലും പൊലീസുകാര്‍ ഡ്യൂട്ടി ചെയ്യുന്നുണ്ടെന്ന് വാര്‍ത്തകള്‍ പുറത്തുവന്നിരുന്നു. ഇതില്‍ അമൃതാനന്ദമയിയുടെ വീട്ടില്‍ ആറ് പൊലീസുകാരുണ്ടെന്നും കാന്തപുരത്തിന്റെ വീട്ടില്‍ രണ്ട് പൊലീസുകാരുണ്ടെന്നുമായിരുന്നു ചില മാധ്യമങ്ങള്‍ റിപ്പോര്‍ട്ട് ചെയ്തത്.

ആരുടേയും സുരക്ഷാ സന്നാഹങ്ങള്‍ ഇല്ലാതെ ജനങ്ങള്‍ക്കിടയില്‍ പ്രവര്‍ത്തിക്കുവാന്‍ ഇക്കാലമത്രയും സര്‍വ്വശക്തന്റെ അനുഗ്രഹത്താല്‍ സാധിച്ചിട്ടുണ്ട്. പൊലീസിലെ ഒരു ഉദ്യോഗസ്ഥരും യാത്രയിലോ വീട്ടിലോ സുരക്ഷക്കായി ഇല്ല. വ്യാജ വാര്‍ത്തകള്‍ നല്‍കുന്നതില്‍ നിന്ന് മാധ്യമങ്ങള്‍ മാറിനില്‍ക്കണമെന്നും കാന്തപുരം ആവശ്യപ്പെട്ടു.

കുറിപ്പിന്റെ പൂര്‍ണരൂപം

എന്റെ സുരക്ഷക്കായി സംസ്ഥാന പൊലീസിലെ രണ്ട് ഉദ്യോഗസ്ഥര്‍ സ്ഥിരമായി ഉണ്ടെന്ന തരത്തില്‍ വാര്‍ത്ത ശ്രദ്ധയില്‍ പെട്ടു. അങ്ങനെ ആരുടേയും സുരക്ഷാ സന്നാഹങ്ങള്‍ ഇല്ലാതെ ജനങ്ങള്‍ക്കിടയില്‍ പ്രവര്‍ത്തിക്കുവാന്‍ ഇക്കാലമത്രയും സര്‍വ്വശക്തന്റെ അനുഗ്രഹത്താല്‍ സാധിച്ചിട്ടുണ്ട്.

പോലീസിലെ ഒരു ഉദ്യോഗസ്ഥരും യാത്രയിലോ വീട്ടിലോ സുരക്ഷക്കായി ഇല്ല. സെക്യൂരിറ്റിക്കായി ഉദ്യോഗസ്ഥരെ ആവശ്യപ്പെട്ടിട്ടുമില്ല. അടിസ്ഥാനരഹിതമായ വാര്‍ത്തകള്‍ പ്രചരിപ്പിക്കുന്നതില്‍ നിന്ന് മാധ്യമങ്ങളും വ്യക്തികളും വിട്ടുനില്‍ക്കണം.

 
Copyright © 2016. Muhimmath - All Rights Reserved